હાડ થીજવતી ઠંડી વચ્ચે આ તારીખે આવશે વરસાદ , અંબાલાલ પટેલે ખેડૂતોને ચેતવ્યા

Published On: January 17, 2026 11:11 pm

ગુજરાતમાં કડકડતી ઠંડી વચ્ચે હવે હવામાન ફરી પલટાવાની તૈયારીમાં છે. હવામાન નિષ્ણાત અંબાલાલ પટેલે આગાહી કરી છે કે જાન્યુઆરીના અંત સુધી રાજ્યમાં ઠંડી, ધુમ્મસ અને કમોસમી વરસાદની પરિસ્થિતિ બની શકે છે. Gujarat rainfall forecast today 2026

તેમણે જણાવ્યું કે 18, 19 અને 20 જાન્યુઆરી દરમિયાન ઠંડીનો પ્રભાવ વધુ રહેશે. ખાસ કરીને વહેલી સવાર અને મોડી રાતે લોકો વધુ ઠંડી અનુભવે તેવી શક્યતા છે.

પાલનપુર અને આબુમાં ઠંડીની અસર વધુ

પાલનપુર અને માઉન્ટ આબુમાં ઠંડીનું જોર વધશે. સવારના સમયે ધુમ્મસ વધતા વાહન વ્યવહાર પર પણ અસર પડી શકે છે. લોકો મુસાફરી દરમિયાન વધુ સાવચેત રહેવાની જરૂર પડશે.

22 જાન્યુઆરી બાદ બદલાશે હવામાન

22 જાન્યુઆરી બાદ પશ્ચિમી વિક્ષેપ સક્રિય થવાથી ગુજરાતના અનેક વિસ્તારોમાં કમોસમી વરસાદની શક્યતા છે. સૌરાષ્ટ્ર, ઉત્તર સૌરાષ્ટ્ર અને કચ્છના કેટલાક વિસ્તારોમાં વરસાદ પડી શકે છે. સાથે સાથે ઉત્તર ગુજરાતના સાબરકાંઠા અને મહેસાણા જિલ્લામાં પણ વરસાદી માહોલ સર્જાઈ શકે છે.

અમદાવાદ અને ગાંધીનગરમાં હવામાન બદલાશે, જ્યારે દક્ષિણ ગુજરાતના કેટલાક વિસ્તારોમાં વાદળછાયું વાતાવરણ અને હલકો વરસાદ નોંધાઈ શકે છે.

22થી 26 જાન્યુઆરી દરમિયાન હવામાન સતત બદલાતું રહેશે, જેમાં 23 અને 24 જાન્યુઆરીના દિવસો સૌથી વધુ અસરકારક રહેશે.

ખેડૂતો માટે ચિંતાજનક સ્થિતિ

કમોસમી વરસાદના કારણે રવિ પાકને નુકસાન થવાની શક્યતા છે. તેથી ખેડૂતોને આગોતરી તૈયારી રાખવાની સલાહ આપવામાં આવી છે. 25 જાન્યુઆરી બાદ ઠંડી ધીમે ધીમે ઘટશે, પરંતુ પછી ફરી એકવાર ઠંડી વધવાની શક્યતા રહેશે.

ફરી આવશે ઠંડીનો ઘેરાવો

ઉત્તર ગુજરાત, કચ્છ અને મધ્ય ગુજરાતમાં ફરી એકવાર તીવ્ર ઠંડી અનુભવાશે. અંબાલાલ પટેલના જણાવ્યા મુજબ 30 જાન્યુઆરીથી 5 ફેબ્રુઆરી વચ્ચે હવામાનમાં ફરી ફેરફાર જોવા મળશે. ફેબ્રુઆરી મહિનામાં કડકડતી ઠંડી રહેશે અને માર્ચ સુધી હવામાનમાં વારંવાર પલટા આવી શકે છે.

રાજ્યમાં ઠંડીના આંકડા

રાજ્યના 10થી વધુ શહેરોમાં લઘુતમ તાપમાન 13 ડિગ્રીથી નીચે નોંધાયું છે. ગત રાત્રે સૌરાષ્ટ્રના કેશોદમાં સૌથી ઓછું તાપમાન 8.1 ડિગ્રી નોંધાયું હતું. ત્યારબાદ નલિયા, અમરેલી અને દાહોદમાં પણ ઠંડીનો પ્રભાવ જોવા મળ્યો.