અમદાવાદ, શહેરમાં નકલી નોટોના મોટા ગેરકાયદેસર રેકેટનો પર્દાફાશ થયો છે. ક્રાઇમ બ્રાન્ચે કાર્યવાહી કરીને ‘શ્રી સત્ય યોગ ફાઉન્ડેશન’ સાથે જોડાયેલા મુખ્ય આરોપી સહિત કુલ 6 શખ્સોને ઝડપી પાડ્યા છે. big fake note scam ahmedabad
મળેલી માહિતી મુજબ, સુરતથી નકલી નોટો અમદાવાદ લાવવામાં આવી રહી હતી. આ બાતમીના આધારે અમરાઈવાડી વિસ્તારમાં પોલીસ દ્વારા વોચ ગોઠવાઈ હતી. તપાસ દરમિયાન શંકાસ્પદ ફોર્ચ્યુનર કાર રોકી તપાસ કરતાં અંદાજે ₹2.10 કરોડની નકલી ₹500ની નોટો મળી આવી હતી. કાર પર ‘Government of India’ અને ‘Ayush Ministry’ લખાણ લખાયેલું હતું, જે પોલીસને ભ્રમિત કરવા માટે વપરાતું હતું.
આરોપીઓની પૂછપરછમાં બહાર આવ્યું કે આ નકલી નોટોનું નેટવર્ક સુરત જિલ્લાના કામરેજ તાલુકાના ધોરણ પારડી ગામમાં આવેલા આશ્રમમાંથી સંચાલિત થતું હતું. ક્રાઇમ બ્રાન્ચે ત્યાં દરોડા પાડી વધુ ₹80 લાખની નકલી નોટો, પ્રિન્ટિંગ મશીનો અને અન્ય સામગ્રી કબ્જે કરી છે.
પોલીસે જણાવ્યું કે આરોપીઓ બજારમાં નોટો ફેલાવવા માટે આકર્ષક ઓફર આપતા હતા. તેઓ ₹500ની અસલ નોટ સામે ₹1500ની નકલી નોટ આપતા હતા અને એજન્ટો દ્વારા નેટવર્ક વિસ્તૃત કરવાની યોજના બનાવી રહ્યા હતા.
આ કેસમાં પોલીસ દ્વારા કુલ 40,000થી વધુ નકલી નોટો જપ્ત કરવામાં આવી છે. હાલ વધુ તપાસ હાથ ધરાઈ રહી છે કે આ રેકેટના તાર અન્ય રાજ્યો સુધી જોડાયેલા છે કે નહીં અને અગાઉ કોઈ નકલી નોટો બજારમાં પહોંચી છે કે નહીં.
આ કામગીરીથી રાજ્યમાં નકલી નોટોના મોટા આંતરરાજ્ય રેકેટ અંગે મહત્વપૂર્ણ ખુલાસા થવાની શક્યતા વ્યક્ત કરવામાં આવી રહી છે.
