દશેરાના શુભ દિવસે ગાંધીનગરના નાગરિકો માટે ખુશખબર સામે આવી છે. મુખ્યમંત્રી ભૂપેન્દ્ર પટેલના માર્ગદર્શન હેઠળ ગાંધીનગર મેટ્રો રેલ પ્રોજેક્ટ હવે તેના અંતિમ ચરણમાં પ્રવેશ્યો છે. આજે સચિવાલયથી લઈને અંતિમ સ્ટેશન મહાત્મા મંદિર સુધી મેટ્રોની ટ્રાયલ રન સફળતાપૂર્વક પૂર્ણ કરવામાં આવી છે. ગુજરાત સ્ક્વેર ન્યૂઝ Metro Running From Secretariat To Mahatma Mandir
હાલ સુધી સચિવાલય સુધી મર્યાદિત રહેલી મેટ્રો લાઇનને હવે આગળ વધારી અક્ષરધામ, જુના સચિવાલય, સેક્ટર-16, સેક્ટર-24 અને અંતિમ સ્ટેશન મહાત્મા મંદિર સુધી જોડવામાં આવી છે. ટ્રાયલ રન બાદ હવે કમિશનર ઓફ મેટ્રો રેલ સેફ્ટી (CMRS) સમક્ષ મંજૂરી માટે દરખાસ્ત કરવામાં આવશે.
નૂતન વર્ષમાં ગાંધીનગરને મેટ્રોની ભેટ Metro Running From Secretariat To Mahatma Mandir
જો તમામ મંજૂરીઓ સમયસર મળી જાય તો નૂતન વર્ષના આરંભથી ગાંધીનગરના નાગરિકોને મહાત્મા મંદિર સુધી સીધી મેટ્રો સેવા મળી જશે. આ વિસ્તરણ પૂર્ણ થતા અમદાવાદ અને ગાંધીનગર મળીને કુલ 68 કિલોમીટર લાંબા રૂટ પર 53 સ્ટેશનો મેટ્રોથી જોડાશે.
આ મેટ્રો સેવા મુસાફરીને માત્ર ઝડપી જ નહીં, પરંતુ વધુ સસ્તી, આરામદાયક અને પ્રદૂષણમુક્ત બનાવશે. બંને શહેરોના લાખો નાગરિકોને રોજિંદી મુસાફરીમાં મોટી રાહત મળશે.
ગાંધીનગરના પરિવહનમાં મોટો ફેરફાર
મહાત્મા મંદિર સુધી મેટ્રો શરૂ થતાં અમદાવાદ-ગાંધીનગર વચ્ચે આવન-જાવન વધુ સરળ બનશે. ટ્રાફિક જામની સમસ્યા ટળશે, મુસાફરીનો સમય નિશ્ચિત રહેશે અને રોજિંદા મુસાફરોનો કિંમતી સમય બચશે.
કાર કે ટેક્સી બદલે મેટ્રો પસંદ કરવાથી ઇંધણ ખર્ચ, ટોલ ટેક્સ અને પાર્કિંગની ઝંઝટમાંથી પણ રાહત મળશે. ધીમે ધીમે લોકો વ્યક્તિગત વાહનો છોડીને મેટ્રો તરફ વળશે, જેના કારણે શહેરની સડકો પર ટ્રાફિકની ગીચતા ઘટશે.
અમદાવાદ-ગાંધીનગર વચ્ચે કનેક્ટિવિટી વધુ મજબૂત
સરકારી કર્મચારીઓ, વિદ્યાર્થીઓ અને વ્યવસાયિકો માટે આ મેટ્રો લાઇન ખૂબ ઉપયોગી બનશે. સચિવાલય, મહાત્મા મંદિર, સેક્ટર-16 અને સેક્ટર-24 જેવા મહત્વના વિસ્તારો સીધા મેટ્રોથી જોડાશે. ગાંધીનગરની યુનિવર્સિટીઓ અને કોલેજોમાં અભ્યાસ કરતા અમદાવાદના વિદ્યાર્થીઓ માટે પણ હવે મુસાફરી વધુ સરળ બનશે.
વેપાર અને ઉદ્યોગ ક્ષેત્રે પણ તેનો મોટો લાભ મળશે. બંને શહેરોના વ્યવસાયિક વિસ્તારો વચ્ચે ઝડપી કનેક્ટિવિટી થતાં વેપાર-ધંધાને નવી ગતિ મળશે.
પર્યાવરણ માટે રાહત
મેટ્રો જેવી જાહેર પરિવહન વ્યવસ્થા વાહનોમાંથી થતા ધુમાડા અને કાર્બન ઉત્સર્જનમાં ઘટાડો કરે છે. પરિણામે શહેરનું હવા પ્રદૂષણ ઘટશે અને સ્વચ્છ પર્યાવરણ તરફ મોટું પગલું ભરાશે.
આર્થિક અને સામાજિક વિકાસને વેગ
ગિફ્ટ સિટી, ઇન્ફોસિટી જેવા વ્યાવસાયિક હબને મેટ્રો કનેક્ટિવિટી મળતાં અહીં કામ કરતા હજારો લોકો માટે મુસાફરી વધુ સુવિધાજનક બનશે. ઉત્પાદકતા વધશે અને સ્થાનિક અર્થતંત્રને મજબૂતી મળશે.
રિયલ એસ્ટેટને પણ મળશે બૂસ્ટ
નવા મેટ્રો સ્ટેશનોની આસપાસ રહેણાંક અને વ્યાવસાયિક પ્રોજેક્ટ્સની માંગ વધશે. રિયલ એસ્ટેટ ક્ષેત્રે નવી તકો ઊભી થશે. સારી પરિવહન સુવિધા મળવાથી શહેરમાં રહેવાની ગુણવત્તા પણ સુધરશે.
