અમેરિકા આ સમયે સદીના સૌથી ખતરનાક શિયાળાના તોફાનોમાંના એકનો સામનો કરી રહ્યું છે. રૉકી માઉન્ટેન્સથી લઈને પૂર્વીય દરિયાકાંઠા સુધી ભારે હિમવર્ષા, ગોળા અને જમતી ઠંડીના વરસાદથી પરિસ્થિતિ અત્યંત ગંભીર બની ગઈ છે. હવામાન વિભાગના જણાવ્યા અનુસાર આ તોફાન દેશના મોટા ભાગમાંથી પસાર થશે, જેના કારણે સામાન્ય જીવન અસ્તવ્યસ્ત થવાની શક્યતા છે. Us storm news
તોફાનને કારણે સમગ્ર અમેરિકા ભરમાં વિકએન્ડ દરમિયાન 8,000થી વધુ ફ્લાઇટ્સ રદ્દ કરવી પડી છે. આવનારા દિવસોમાં 14 કરોડથી વધુ અમેરિકન નાગરિકોને કડાકા ભરી ઠંડી અને જોખમી હવામાનનો સામનો કરવો પડી શકે છે.
એક ડઝનથી વધુ રાજ્યોમાં ઇમરજન્સી જાહેર
પરિસ્થિતિની ગંભીરતાને ધ્યાનમાં રાખીને અમેરિકા ના એક ડઝનથી વધુ રાજ્યોમાં હવામાન ઈમરજન્સી જાહેર કરવામાં આવી છે. ન્યૂ મેકસિકોથી લઈને ન્યૂ ઇંગ્લેન્ડ સુધી વિન્ટર સ્ટોર્મની ચેતવણી આપવામાં આવી છે.
નેશનલ વેધર સર્વિસે પૂર્વ ટેક્સાસથી નોર્થ કેરોલાઇના સુધી બરફ અને જમતી વરસાદની એક “ખતરનાક પટ્ટી” બનવાની ચેતવણી આપી છે. શુક્રવાર રાત્રે જ ટેક્સાસના કેટલાક વિસ્તારોમાં જમતો વરસાદ અને ગોળા પડવાની શરૂઆત થઈ ગઈ હતી.
હવામાન વિભાગે આગાહી કરી છે કે દક્ષિણમાંથી પસાર થયા બાદ તોફાન ઉત્તર-પૂર્વ તરફ આગળ વધશે. વોશિંગ્ટન, ન્યૂયોર્ક અને બોસ્ટન સહિતના વિસ્તારોમાં લગભગ એક ફૂટ જેટલી બરફવર્ષા થવાની શક્યતા છે. અનેક રાજ્યોના ગવર્નરોએ લોકોને ઘરમાં રહેવાની અપીલ કરી છે.
8,300 ફ્લાઇટ્સ રદ્દ, હવાઈ સેવાઓ ઠપ
ફ્લાઇટ ટ્રેકિંગ વેબસાઇટ FlightAware અનુસાર, શનિવારે 3,400થી વધુ ફ્લાઇટ્સમાં વિલંબ થયો અથવા તેને રદ્દ કરવામાં આવી. રવિવાર માટે પહેલેથી જ 5,000થી વધુ ફ્લાઇટ્સ રદ્દ કરી દેવાઈ છે. આમ કુલ મળીને અત્યાર સુધીમાં 8,300 જેટલી ફ્લાઇટ્સ પ્રભાવિત થઈ ચૂકી છે.
ભારતીય એરલાઇન કંપની એર ઇન્ડિયાએ ન્યૂયોર્ક અને નેવાર્કથી આવતી-જતી તેની તમામ ફ્લાઇટ્સ 25 અને 26 જાન્યુઆરી માટે રદ્દ કરી છે. એર ઇન્ડિયાએ મુસાફરોને તેમની ફ્લાઇટનું સ્ટેટસ તપાસવા અને વિકલ્પી વ્યવસ્થા કરવાની સલાહ આપી છે.
વીજ પુરવઠા પર પણ સંકટની શક્યતા
તોફાન અને ભારે બરફવર્ષાને કારણે અનેક વિસ્તારોમાં વૃક્ષો ધરાશાયી થવાની ભીતિ છે, જેના કારણે વીજ લાઈનોને નુકસાન પહોંચી શકે છે. ઊર્જા કંપનીઓએ સંભવિત વીજ કાપ માટે આગોતરી તૈયારી શરૂ કરી દીધી છે.
