બલૂચ લિબરેશન આર્મીએ આખું રેલવે સ્ટેશન ઉડાવી દીધું, 14 પાકિસ્તાની સૈનિકો સહિત 25 લોકો માર્યા ગયા. પાકિસ્તાનના બલૂચિસ્તાનમાં ક્વેટા રેલ્વે સ્ટેશન નજીક શનિવારે થયેલા વિસ્ફોટમાં ઓછામાં ઓછા 25 લોકોના મોત થયા છે અને 40 થી વધુ લોકો ઘાયલ થયા છે. બ્લાસ્ટ સમયે પ્લેટફોર્મ પરથી પેશાવર જવા માટે એક ટ્રેન તૈયાર હતી.
પાકિસ્તાનના ક્વેટામાં રેલવે સ્ટેશનની અંદર જોરદાર વિસ્ફોટ થયો છે, જેમાં પાકિસ્તાની સેનાના 14 સૈનિકો સહિત 24 લોકોના મોત થયા છે જ્યારે 4થી વધુ લોકો ઘાયલ હોવાનું કહેવાય છે. ક્વેટાના વરિષ્ઠ પોલીસ અધિક્ષક (એસએસપી) મોહમ્મદ બલોચે મીડિયાને જણાવ્યું કે ઘાયલોને નજીકની હોસ્પિટલમાં દાખલ કરવામાં આવ્યા છે.
અગાઉ, એસએસપી મોહમ્મદ બલોચે કહ્યું હતું કે આ ઘટના “આત્મઘાતી વિસ્ફોટ જેવી લાગે છે, પરંતુ કંઈપણ કહેવું વહેલું છે.” વિસ્ફોટનું સ્વરૂપ જાણવા માટે તપાસ ચાલી રહી છે. અગાઉ, ઈધી બચાવ સેવાના વડા ઝીશાને કહ્યું હતું કે વિસ્ફોટ “રેલ્વે સ્ટેશનની અંદરના પ્લેટફોર્મ પર થયો હતો.”
ટ્રેન પેશાવર જવા રવાના થવાની હતી
બલૂચિસ્તાન સરકારના પ્રવક્તા શાહિદ રિંદે એક નિવેદનમાં જણાવ્યું કે પોલીસ અને સુરક્ષા દળો ઘટનાસ્થળે પહોંચી ગયા છે. રિંદે કહ્યું કે વિસ્ફોટની પ્રકૃતિની તપાસ કરવામાં આવી રહી છે. બોમ્બ ડિસ્પોઝલ સ્ક્વોડ ઘટનાસ્થળેથી પુરાવા એકત્ર કરી રહી છે અને ઘટનાનો રિપોર્ટ માંગવામાં આવ્યો છે.
સરકારી અધિકારીએ કહ્યું કે ત્યાંની હોસ્પિટલોમાં ‘ઇમરજન્સી’ લાદી દેવામાં આવી છે. તેમણે કહ્યું કે “ઘાયલોને તબીબી સહાય પૂરી પાડવામાં આવી રહી છે.” ઘટનાના ફૂટેજમાં રેલ્વે સ્ટેશનના પ્લેટફોર્મ પર કાટમાળ દેખાઈ રહ્યો છે જે સમયે પ્લેટફોર્મ પરથી એક ટ્રેન પેશાવર જવા માટે તૈયાર હતી.
